Tag Archive | Madhwa marriage

469. Madhwa marriage – Part I

     காலம் ரொம்பவே மாறிப் போய் விட்டது. நடக்குமா என்று நாம் ஆசைப்பட்ட நிறைய விஷயங்கள் நிஜமாகவே நடக்கும்போது மிகவும் சந்தோஷமாக இருக்கிறது. மாப்பிள்ளை வீட்டார் பெண் வீட்டாரிடம் மிகவும் சகஜமாக பழக ஆரம்பித்து விட்டார்கள். மணப்பெண்ணைத் தங்கள்  பெண் போல் நடத்துவதைக் காணும்போது, “இதற்குத்தானே ஆசைப்பட்டோம்”, என்று உள்ளம் பூரித்துப் போகிறது. பெண் வீட்டாரும், மாப்பிள்ளை வீட்டாரும் கைகோர்த்துத் திருமண காரியங்களை நடத்துவதைக் காணும்போது உள்ளம் சந்தோஷத்தில் துள்ளிக் குதிக்கிறது. சரி, மாத்வா சம்பிரதாயப்படி நடக்கும் ஒரு திருமணத்திற்குத் தேவையான பொருட்கள் என்னென்ன, முக்கிய நிகழ்வுகள் யாவை என்றெல்லாம் பார்ப்போமா !

இதைப் படிக்கும் போது, எங்கள் வீட்டுத் திருமணத்தில் இது நடைபெறவில்லையே, இந்தப் பொருள் பயன்படுத்தப் படவில்லையே என்று சிலர் நினைக்கக் கூடும். வீட்டுக்கு வீடு, குடும்பத்திற்குக் குடும்பம் சில பழக்க, வழக்கங்கள் வித்தியாசப் படலாம். உங்களுக்கு ஏற்புடைய விஷயங்களை மட்டும் ஏற்றுக் கொள்ளுங்கள், முடியாதவற்றை விட்டுவிடுங்கள் என்று தாழ்மையுடன் கேட்டுக் கொள்கிறேன்.

1.பெண் பார்த்தல் : முதலில் பெண்ணுடைய ஜாதகத்தையும், மாப்பிள்ளையுடைய ஜாதகத்தையும் ஒரு நல்ல ஜோசியரிடம் கொடுத்து பொருத்தம் பார்க்க வேண்டும். பொருந்தினால், பெண்ணும், மாப்பிள்ளையும் போட்டோ பார்த்து, மற்ற விஷயங்களும் பிடித்தால், பெண் பார்க்கும் வைபவம் நடத்தலாம். ஒரு நல்லநாள் பார்த்து, மாப்பிள்ளை வீட்டாரை பெண் வீட்டுக்கு அழைத்து, பெண் பார்க்கச் சொல்லலாம். இருவருக்கும் பிடித்திருந்தால், கல்யாண ஏற்பாடுகளை ஆரம்பிக்கலாம்.

2.நிச்சயதார்த்தம் : ஒரு சுபநாளில் மாப்பிள்ளை வீட்டார் தங்கள் வீட்டிலோ, மண்டபத்திலோ பெண் வீட்டாரை அழைத்து நிச்சயதார்த்தம் நடத்த வேண்டும். பெண் வீட்டார் மாப்பிள்ளைக்கான உடை, மோதிரம், மற்றும் அவருக்குத் தேவையான பொருட்கள், மாப்பிள்ளையின் பெற்றோருக்கான புது ஆடைகள், வெற்றிலை, பாக்கு, மஞ்சள், குங்குமம், 5 வகை பழங்கள், பூ, இனிப்பு, பொட்டுக்கடலை, அச்சு வெல்லம் கொண்ட டப்பாக்கள், கடலை கோபுரம் 2, கடலை உருண்டைகள் 5, சீர் முறுக்குகளான தேங்குழல், கைமுறுக்கு. முள்முறுக்கு, சில ரவிக்கைத் துண்டுகளுடன் வர வேண்டும். மாப்பிள்ளை வீட்டாரும் அதேபோல, பெண்ணுக்குத் தேவையான பொருட்களுடன் தயாராக இருப்பார்கள். பெண்ணின் பெற்றோருக்கான புது ஆடைகளையும் கொண்டு வருவர். புரோகிதர் வந்து பெண், மாப்பிள்ளையின் பெற்றோரைத் தாம்பூலம் மாற்றிக் கொள்ள வைத்து, நிச்சயதார்த்த வைபவத்தை நடத்தி வைத்து, இரு வீட்டாரின் ஒப்புதலுடன் திருமண தேதியை அறிவித்து, லக்ன பத்திரிக்கையைப் படிப்பார்.

3.மஞ்சள் இடித்தல் : நிச்சயதார்த்தம் முடிந்தவுடன் இதை பெண்வீட்டார் தனியாகவும், மாப்பிள்ளை வீட்டார் தனியாகவும் அவரவர் வீட்டில் செய்வார்கள். முதலில் மஞ்சள் பிள்ளையார் பிடித்து, விளக்கேற்றி, அதற்கு மஞ்சள், குங்குமம், பூ, சந்தனம், அட்சதை கொண்டு பூஜை செய்து, ஆரத்தி எடுக்க வேண்டும். ஒரு சிறு உரலையும், குழவியையும் எடுத்து சுண்ணாம்பு, காவி கொண்டு கோடுகள் போட்டு அலங்கரிக்க வேண்டும். பின், மஞ்சள், குங்குமம், பூ, சந்தனம், அட்சதை கொண்டு பூஜை செய்ய வேண்டும். ஒவ்வொரு சுமங்கலியாக வந்து 5 மஞ்சள் கிழங்குகளை உரலில் போட்டு ஒன்றிரண்டாக இடித்துத் தனியாக வைக்க வேண்டும். கடைசியாக, பெண்/மாப்பிள்ளை, அவர்கள் பெற்றோர், திருமண வயதில் உள்ள பெண்/பையன் மஞ்சள் இடித்து முடித்தபின், சுமங்கலிகளுக்குக் கண்டிப்பாக மஞ்சள், குங்குமம், மங்கலப் பொருட்கள், ரவிக்கைத்துண்டு, தக்ஷணை வழங்க வேண்டும். ஒன்றிரண்டாக இடித்த மஞ்சள் கிழங்குகளை மிஷினில் கொடுத்துப் பொடியாக்கி அரிசி மாவு கலந்து தினமும் வாசலில் கோலமிட பயன்படுத்த வேண்டும்(திருமணம் முடியும் வரை). அதில் சிறிது மஞ்சள் தூளை திருமணத்தின் போது கௌரி பூஜைக்குப் பயன்படுத்த வேண்டும். சொண்டிகை முகூர்த்தத்திற்கும் அந்த மஞ்சள் பொடியைத்தான் உபயோகிக்க வேண்டும். மஞ்சள் இடித்த அன்று திருமணத்திற்கான மங்கலப் பொருட்கள் ஏதாவது கண்டிப்பாக வாங்க வேண்டும். திருமணக்காரியம் அன்றே ஆரம்பித்ததாக ஐதீகம்.

4.திருமணப் பத்திரிக்கை பிரிண்ட் செய்தல் : நல்ல நாள் பார்த்து திருமணப் பத்திரிக்கை பிரிண்ட் செய்யக் கொடுக்க வேண்டும். முதல் பத்திரிக்கையை குலதெய்வத்தின் பாதத்தில் வைத்து வணங்கிவிட்டு, மற்றவர்களுக்கு வினியோகிக்கத் துவங்க வேண்டும்.

 5.சுமங்கலி பிரார்த்தனை : வீட்டில் சுபகாரியம் நடைபெறும் முன்பு முன்னோரின் ஆசி பெறுவது அவசியம் அல்லவா. பொதுவாக 5 சுமங்கலிகள் (சிலர் அப்பா வகை நெருங்கிய சொந்தமாகவும், சிலர் அம்மா வகை நெருங்கிய சொந்தமாகவும் இருத்தல் வேண்டும். பூஜை செய்பவருக்கு மகள் இருந்தால் அவரையும் சேர்த்துக் கொள்ளலாம்). முதலே அவர்களிடமிருந்து அவர்களுடைய ரவிக்கை வாங்கி வைக்க வேண்டும். அந்த 5 ரவிக்கைகள்+பூஜை செய்பவருடைய ரவிக்கை=மொத்தம் 6 ரவிக்கைகள், புதிய ஆறு 9 கெஜம் புடவைகள்(பச்சை நிறம் உகந்தது), 5 புதிய ரவிக்கைத்துணிகள் ஆகியவற்றை மடியில் உலர்த்த வேண்டும். பூஜை நடைபெறும்போது 6 பெண்களும் எண்ணை தேய்த்துக் குளிக்க வேண்டும்.  பின் மடிப்புடவைகளை அனைவரும் உடுத்திக் கொள்ள வேண்டும். பூஜை செய்பவர் 5 பெண்களையும் கிழக்கு நோக்கி வரிசையாக அமர்த்தி, அவர்களுக்கு மஞ்சள், குங்குமம், பூ, வெற்றிலை, பாக்கு, பழம், மங்கல சாமான்களான  கண்ணாடி, வளையல், சீப்பு, காதோலை-கருகுமணி,  கண்மை, கெஜவஸ்திரம், தக்ஷிணை, மடி ரவிக்கை இவற்றை ஒரு சிறு டப்பாவில் வைத்துக் கொடுத்து, அவர்களுக்கு உருட்டாணி செய்ய வேண்டும். அதாவது, மஞ்சள்தூளை எடுத்து வலது, மற்றும் இடது கன்னம், வலது, மற்றும் இடது கையில் லேசாக தீற்றி, முதலில் வலது காலுக்கு மஞ்சள் தூளை  நீர் சேர்த்துத் தடவ வேண்டும். அதேபோல் இடது காலுக்கும் செய்ய வேண்டும். பின், மஞ்சள் தூளில் சுண்ணாம்பு  சேர்த்து (ஹளிதி என்பார்கள்) வலது கை ஆள்காட்டி விரல் கொண்டு இரு கால்களின் ஓரத்திலும் கோடு போட்டு, கால் நடுவில் குறுக்காக இரு கோடுகள் போட்டு, அதன் நடுவில் ஒரு பொட்டு, மற்றும் கால் கட்டைவிரல் மேல் ஒரு பொட்டு ஹளிதியினால் வைக்க வேண்டும். பின், சுமங்கலிகளுக்கு ஆரத்தி எடுத்து விட்டு, பூஜை செய்பவரின் குடும்பம் அவர்கள் காலில் விழுந்து ஆசி பெற வேண்டும். பின் இலை போட்டு, இலை முன்பு கோலம் போட வேண்டும். மெழுகுவர்த்தி இலைகளின் இருபுறமும் ஏற்ற வேண்டும். மடியாக பண்டிகை சமையலை சுமங்கலிகளுக்குப் பரிமாறி, அவர்கள் உண்ட பின்பே மற்றவர்கள் உணவு உண்ண வேண்டும். இதை, திருமண வைபவம் நடைபெறும் முன்பு ஏதாவது வெள்ளிக்கிழமை செய்யலாம். இதை பெண் வீட்டார் தங்கள் வீட்டிலும், மாப்பிள்ளை வீட்டார் தங்கள் வீட்டிலும் செய்வார்கள்.

6.சாதேவி பூஜை : ஒரு மடிப்பாட்டியை வீட்டுக்கு அழைத்து மடியாய் உணவு செய்து பரிமாறி, வெற்றிலை, பாக்கு, புடவை, ரவிக்கை, தக்ஷிணை வைத்து வழங்க வேண்டும். இதுவும், பெண் வீட்ட்டார் தங்கள் வீட்டிலும், மாப்பிள்ளை வீட்டார் தங்கள் வீட்டிலும் செய்வார்கள்.

7.பந்தக்கால் நடுதல் : இதற்கு குறைந்த பட்சம் 5 சுமங்கலிகளை அழைக்க வேண்டும். பந்தக்கால் நடுபவருக்கும், பந்தல் போடுபவருக்கும் முன்பே சொல்லி விட வேண்டும். அவர்கள் பந்தக்கால் நட குழி தோண்டித் தருவார்கள். பந்தக்காலுக்கு பால், மற்றும் தண்ணீர் மூன்று முறை விட்டு, மஞ்சள், குங்குமம், பூ, அட்சதை, சந்தனம், கஜவஸ்திரம் கொண்டு அனைவரும் பூஜை செய்த பின், பந்தக்காலை அனைவரும் பிடித்து நட வேண்டும்.அதற்கு ஆரத்தி எடுக்க வேண்டும். வந்திருந்த அனைவருக்கும் உணவளிக்க வேண்டும். வாசலில் பந்தல் போட்டு, வாழை, கமுகு, தென்னை ஓலைகளால் பந்தலை அலங்கரிக்க வேண்டும். வாழைமரம் இருபுறமும் குலையுடன் கட்ட வேண்டும். மாவிலைத் தோரணமும் கட்டி வீட்டு வாசலை அழகுபடுத்த வேண்டும். பந்தக்கால் நடுதலையும் பெண் வீட்டார் தங்கள் வீட்டிலும், மாப்பிள்ளை வீட்டார் தங்கள் வீட்டிலும் செய்வது வழக்கம்.

8.தேவரு பூஜை : மண்டபத்திற்குப் பெண் வீட்டார் கிளம்பும் முன்பு, புரோகிதர் வந்து வீட்டில் சாலிகிராம பூஜை செய்விப்பார். அதேபோல மாப்பிள்ளை வீட்டார் தங்கள் வீட்டில் செய்வார்கள்.

மண்டபத்திற்கு எடுத்துச் செல்ல வேண்டிய பொருட்களைப் பற்றி அடுத்த வலைப்பதிவில் சொல்கிறேன்.